World Sports Photography Awards 2026入圍名單公布：體育攝影界嘅頂級showcase
World Sports Photography Awards 2026嘅入圍名單終於出爐，呢個被視為體育攝影界「天花板」嘅比賽今屆規模創歷史新高，吸引咗來自123個國家或地區嘅約4,100名攝影師參與，提交超過23,000張作品。
自2020年創辦以來，World Sports Photography Awards喺短短6年間已經迅速成長為全球最具代表性嘅體育攝影比賽之一。今年不但參賽規模再創新高，更加迎來一個重要轉折點，就係Canon首度成為官方合作夥伴，呢個合作某程度上反映咗呢個比賽喺專業圈子內嘅認受性。
World Sports Photography Awards聯合創辦人Simon Burton形容過去一年全球體育賽事精彩紛呈，來自不同運動項目同地區嘅投稿作品，令評審團既期待亦備受挑戰。有咗Canon嘅加入，大會將於下月增設「Canon Emerging Talent Award」，專門表揚30歲以下、具潜力嘅新一代體育攝影師。
24個組別涵蓋全方位運動項目
今屆比賽一共設有24個組別，涵蓋由美式足球、田徑、足球，到冬季運動等各類項目。單係入圍名單，每個組別便有數十張作品，整體數量相當可觀。即使只係入圍階段，不少作品喺構圖、時間掌握，以及敘事層面上，已展現出極高完成度。
呢啲入圍作品展示咗體育攝影師嘅專業技術同創意視角，每一張相片都捕捉到運動員嘅精彩瞬間，無論係游水、籃球、足球定係極限運動，都呈現出令人震撼嘅視覺效果。
完整入圍作品集已上載至World Sports Photography Awards官方網站，有興趣嘅讀者可以自行瀏覽「偷師」。最終得獎結果將於下月正式揭曉，屆時將會見證邊張作品能夠脫穎而出，成為今屆嘅總冠軍。
來源：World Sports Photography Awards